Prueba de conocencia de la llingua asturiana. Convocatoria xineru.

 Prueba de conocencia de la llingua asturiana

CONVOCATORIA DE XINERU *

L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pa conocimientu xeneral:

1. Nos meses de xineru y mayu celébrense les pruebes, abiertes a toles persones interesaes.

2. Unos quince díes enantes de les pruebes va abrise un plazu de matrícula.

3. A les persones declaraes aptes nes pruebes citaes, l'Academia dará-yos un documentu onde s'afite la conocencia nel nivel 1 o básicu según calces siguíos por esta Institución.

4. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.

5. Pal bon resultáu d'estes pruebes habrá tenese un dominiu básicu de les estayes que vienen darréu:

a. ESTAYA LLINGÜÍSTICA

a.1. Teoría gramatical: conocencia y dominiu del funcionamientu gramatical del asturianu y de la normativa académica.

a.2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.

a.3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.

b. ESTAYA DE LLINGUA Y SOCIEDÁ

Conocencia del allugamientu de la llingua dientro de la sociedá asturiana asina como del procesu de normalización en que ta inxerta.

6. La prueba va tener dos partes, una escrita (dictáu, torna, exercicios gramaticales, redaición) y otra falada (conversación).

Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2005, 6ª ed.; Gramática de la Llingua Asturiana, ALLA, Uviéu, 2001, 3ª ed.).

Asina mesmo, aconséyase la llectura de testos fechos acordies cola normativa, como los asoleyaos por esta Academia.

* En resultes d'esto, el 28 de xineru de 2012 va facese la prueba semestral. El plazu de matrícula ye del 16 al 26 de xineru. Horariu de matrícula: llunes a xueves de 9:00 h. a 15:00 h. y de 16:00 h. a 19:00 h. Vienres de 9:00 h. a 14:00 h.

PA MÁS INFORMACIÓN
C/L'Águila 10
Tfnu. 985 21 18 37 - Fax. 985 22 68 16
Apartáu de Correos 574 E-33080 UVIÉU
E-mail: alla@asturnet.es

CURSOS ASTURIANU DE LA U.P.

CURSOS D’ASTURIANU DE LA U.P.

La Universidá Popular de Xixón ufierta un añu más los sos cursos d'asturianu en dos niveles, básicu y mediu, siendo la duración total de dambos de trenta hores llectives.

Estos cursos van empobinaos a les persones que quieran averase al conocimientu del asturianu, tanto falao como escrito, pente medies d'exercicios gramaticales y d'espresión escrita. Asina mesmo van tratase conteníos venceyaos a la normalización y recuperación llingüística que ta llevándose a cabu dende los diferentes ámbitos: institucionales y sociales.
Dambos cursos van ser de trenta hores de duracción n'horariu de 19.30 a 21.30 hores. La fecha d'aniciu ye'l 15 de febreru y tarán impartíos nel Centru de Cultura Antiguu Institutu.

Pa más información: http://www.asturies.org/alagueta/la-up-abrel-plazu-pa-los-sos-cursos-dasturianu