El recuerdu, como les veles,
brilla más en Navidá
(Charles Dickens)
Y ASINA, ALCORDÁNDOMOS DE VÓS, EL SERVICIU DE NORMALIZACIÓN LLINGÜÍSTICA DE LA MANCOMUNIDÁ D’EL CABU PEÑES DESÉAVOS UNES FELICES FIESTES Y PRESTOSU AÑU 2012 COMPARTIENDO ESTI CUENTU PENSÁU NOS NEÑOS Y NEÑES DE LES NUESTRES TIERRES Y MÁS P’ALLÁ, ¡FELICIDAES!
XUANÍN Y LA CENA DE NUECHEBONA
Dicen que la navidá ye la meyor época del añu p’aconceyase cola familia y les persones queríes y gociar de los meyores momentos xuntos, pero a min dame que xuntar tanta xente nun siempre ye cosa fácil nin sal too como pensabes….
Na mio familia solemos repartir les vacaciones de navidá ente Llangréu y Bañugues. Pa esti añu la primer parte de les vacaciones díbemos pasales n’El Llugar (Bañugues) en casa d’unos amigos asina que los preparativos de la cena de nuechebona repartiéronse ente les dos families. De la cena encargábase mio güela Linda porque anque mio pá ye’l que suel cocinar en casa, nestes fiestes mio güela nun consiente que naide caciple na so cocina. Mio pá vio’l cielu abiertu porque nel repartu les xeres tocó-y facese col pescáu y el mariscu, cosa que-y prestó enforma y asina aprovechó la ocasión pa dir pescar col so amigu Ramón y anque, según él, dába-y muncha pena nun ocupase de la reciella y “llibrase” del matu que taba montáu en casa, a min dame que la cara felicidá que llevaba espeyaba un estáu d’ánimu bien diferente a la decepción. Mio ma, xunto cola muyer de Ramón, engalanaron la casa con adornos caseros fechos coles “copes” de les caxes de güevos envueltes en papel “albal”, estrelles de cartón cubiertes de purpurina, llazos de colores, muñecos de nieve fechos con cartón blanco recubierto d’algodón y piñes y castañes pintaes con spray plateao y dorao y que los neños y neñes de les dos families díbemos pañando en prau. El casu yera tar tol mundu ocupáu. Hasta Starsky, el perru, taba bien afanáu furando nos furacos del prau como buscando daqué colo que collaborar na fiesta. Mio güelu teníalo claro: de la bebida encargábase él.
Yo, fartucu de tar en prau, y camentando que me diben espetar el cuidáu de la mio hermana, decidí echar un gabitu a mio güela na cocina. Hai que tener en cuenta que dende que naciere Paula pal mes de mayu les atenciones a la mio persona teníen que repartise al 50% con esa “cosa” que nun facía más que dormir y comer, y yera del too necesario contribuir con daqué importante pa facer del “menda lerenda” persona indispensable na familia.
Yo tengo un rasgu de personalidá mui marcáu: la insistencia. Dicen que soi más testón qu’un mulu. Y asina, depués de machacar bien de veces en qué podía ayudar, y depués de que mio güela se ficiere la “lloca” otra milenta veces, ésta contestó:
“Val, vas encargate d’esmigayar el pescáu que ta cociendo na pota pa preparar yo depués la sopa. En cuantes t’avise de que’l caldu tea bien frío, vas esfaraguyándolo too, con cuidáu de les espines, y vas poniéndolo too nesti llargueru. De lo demás encárgome yo”
¡Paez mentira que xera tan fácil llevare tantu tiempu, quién me mandaría a min abrir la bocona!
Mentanto, mio güela foi preparando’l pitu caleya pa detrás y poniendo a remoyar les fabes pal pote de berces y fariñona que diba preparar pa la comida de navidá.
En cuantes terminé col mio llabor llamé a mio güela pa que preparare la sopa.
“Güeli, yá terminé, yá esmigayé tol pescáu, separté les espines y les cabeces y tiré l’agua al váter”
“¿Qué agua, fíu?”
“L’agua onde preparesti’l pescáu”, contesté
Silenciu…más silenciu…un silenciu mui, mui estrañu.
Pisaes de mio güela farfullando y galguiando pel pasiellu…
“¿Que tiresti, qué?” “¡Polo que más quieras fíu del alma que yera’l caldu la sopa!”
De sópitu mio güela entamó cambiar de color pasando d’un pálidu natural nella a un naranxa intensu p’acabar nun encarnáu encesu. Taba claro que’l primer platu la cena díbemos saltalu.
“¡Sal d’equí, sal d’equí y nun toques más na cocina. Voi dexar el pitu reposando na cocina carbón y nun quiero que nin t’acerques!”
Intentando arreglar les coses propúnxime encuriosar un pucuñín la casa: fregué la cacía que quedaba, recoyí tolos papeles y cartones que sobraren de los adornos que ficiéremos y como nun me cabía too nel caxón la basura, fui metiéndolo too na cocina carbón, incluíos los botes de spray colos que pintáremos les piñes y les castañes. Nun me dio tiempu posar el ganchu la cocina cuando ¡BOOOOM!, un estruendu casi me dexa sordu.
“¡La bombona butanu!” gritaron toos, y al arimase a la cocina vieron tol desastre que s’armare: cola fuerza de la detonación los aros de la cocina salieron escopetiaos contra les paredes llevando con ellos el pitu, la caleya, los patatos, les piedres de carbón, los botes y demás “armes de destrucción masiva” que paez ser yo usare pa tizar la cocina.
Otra vez silenciu….y más silenciu….Pero esta vez el silenciu yera distintu.
Col pasu’l tiempu mio ma confesóme que fuere tal el sustu que llevaren al sentir la esplosión y nun veme, que pensaron lo peor. En viendo que taba bien nun sintieron más ganes que cucame, olvidalo too y disfrutar d’esa nueche na qu’entá toos siguíemos xuntos. Y yá na mesa les dos families rimos de tolo que pasare esi día. Si ye verdá que les persones más riques nun son les que más tienen sinón les que menos necesiten, esi día nun había nengún probe sentáu a la mesa. Toos xuntos, los que tábemos presentes y los que non – que siempre han tar tamién presentes, compartimos ún de los meyores momentos vivíos eses fiestes. Ente rises y canciones, migayes de pescáu, güevos y patates frites, la nueche pasó de punteres, como pa nun molestamos.
Con too, a mio güela tovía-y quedaba’l consuelu del platu de navidá: pote de berces con fariñona. Entró na cocina pa enseñamos el riquísimu embutíu que tolos años-y prepara la so amiga de Cardo. Namás entrar vimos salir al perru llambiéndose’l focicu y a mio güela glayar “!Starsky!. ¡LA FARIÑONA!”
